CAAMAÑO&AMEIXEIRAS
O grupo de música tradicional galega con maior proxección internacional
Caamaño&Ameixeiras son unha das grandes revelacións dentro da nova música tradicional galega. Resignificando a música e o baile de raíz galegas cos sons máis contemporáneos, o dúo é un dos nomes máis destacados dentro da escena galega. O seu tratamento íntimo e profundo da tradición popular galega está levando a Sabela Caamaño e Antía Ameixeiras a destacar no panorama nacional e internacional. Cunha posta en escena impactante, coidada e atrevida, contan xa con grandes e numerosas actuacións alén das nosas fronteiras, levando os seus directos a países como Italia, Bélxica, Francia, Portugal, Eslovaquia, República Checa ou Austria. Ademais, as súas cancións acumulan xa centos de miles de escoitas en plataformas dixitais e os seus discos levan miles de copias vendidas.
As artistas galegas inspiraron o seu traballo no universo popular, sendo creadoras dunha atmosfera onde a realidade, a maxia e a relixión conflúen. Nestes últimos anos de carreira, a súa música mudou deses sons alegres e ese carácter colaborativo a un aspecto máis escuro e íntimo, acadando un éxito que as levou a alzarse cun Premio Martín Códax da Música na categoría de Folk, ademais de a tocar en importantes festivais como o Interceltique de Lorient, o Festival de Ortigueira, o Festival Tradicionàrius de Barcelona, o Revenidas ou o Osa do Mar.
Un dos grandes atractivos do grupo é a forte aposta polo seu directo. Cunha posta en escena sorprendente, moi traballada e osada, Caamaño&Ameixeiras está impactando ao público nas súas presentacións. Rodeadas dun equipo de primeiro nivel, no que destaca a presenza de Melania Freire na Dirección Creativa, Judith Adataberna na Dirección de Arte e Escea ou Laura R. Iturralde no Deseño de Iluminación, a banda propón un espectáculo visual e artístico que reforza o seu xa potente directo.
Caamaño&Ameixeiras continua neste 2024 a xira de presentación do seu último traballo discográfico, Quitar o aire (2023), onde as primeiras datas anunciadas da xira levarán ao grupo a cidades como Barcelona ou Girona, así como a países como Austria, Bélxica ou Alemaña. Xa teñen pechadas máis unha vintena de datas para este ano que serán anunciadas proximamente.
