Muerdo edita un novo álbum titulado ‘La Sangre del Mundo‘ que xorde durante o confinamento de 2020 en Sudamérica. O que ía ser unha viaxe estimulante pero usual na vida do músico, que xa desde algúns anos móvese constantemente a ambos os dous lados do charco, converteuse por mor da crise da Covid19 nunha situación completamente extraordinaria. Coas fronteiras pechadas e a imposibilidade de regresar a Europa, o que ía ser unha breve estadía de retiro creativo acabou sendo unha longa tempada introspectiva de composición, o que ía ser un leve achegamento ás culturas e sonoridades suramericanas terminou por converterse nunha experiencia totalmente inmersiva que sen dúbida queda reflectida en ‘La Sangre del Mundo‘, o álbum que agora ve a luz.
Un disco no que Muerdo inicia claramente unha nova etapa sonora como xa presaxiaba o ‘Fin de la Primera Vida’, xira e disco acústico co que o artista se despedía dos escenarios a comezos do ano 2020. Neste novo traballo, que supón unha viaxe de ida e volta transitando ritmos principalmente mediterráneos, andinos e tropicais, Muerdo afiánzase como unha proposta intimamente ligada ao folclore e os sons étnicos, pero nesta ocasión, desposuído de todo prexuízo, atrévese tamén con sintetizadores, programacións, samplers, loops e todo tipo de ornamentacións electrónicas.
O LP conta coas colaboracións especiais de Lido Pimienta, Niño de Elche e Perotá Chingó, e na súa gravación participaron músicos de primeiro nivel e gran talento como Martin Brhun (Depedro, Calamaro…), Javi Casalla (Bajodondo) ou o propio Diego Pérez, produtor musical do disco.