A organización publica o horario completo das tres xornadas, con actuacións desde as 17:00 ata as 3:00 horas.
Os concertos repartiranse entre o Escenario Xacobeo 2027 e o Escenario Turismo Rías Baixas, permitindo gozar de toda a programación sen solapamentos.
O festival SonRías Baixas publica hoxe os horarios da súa próxima edición, que se celebrará no recinto das Lagoas, en Bueu (Pontevedra), do xoves 30 de xullo ao sábado 1 de agosto.
Tras anunciar fai unhas semanas a distribución por xornadas e pechar definitivamente o cartel coa incorporación de Biznaga, o festival dá un paso máis cara á súa celebración desvelando os horarios completos das tres xornadas. O público poderá comezar xa a planificar unha fin de semana que comezará o xoves 30 con Duendeneta Dilleis inaugurando a Zona Gastro, antes de dar paso a Veintiuno, Juventude e Alcalá Norte, mentres que Hoonine será a encargada de pechar a primeira noite coa súa proposta de electrónica, house e synthpop.
O venres 31 estará marcado pola convivencia entre o rock e a electrónica. A xornada arrincará con EME DJ, que animará o espazo gastronómico durante a xornada, e continuará con Ulex, Chiquita Movida, Rager, Barry B, Sobrezero e Ultraligera, antes de que Kike Varela tome o relevo na recta final da noite. O peche do venres correrá a cargo de Zahara (Rave), que porá o broche á xornada co seu espectáculo inmersivo en clave techno.
O sábado 1 de agosto reunirá algúns dos concertos máis esperados desta edición. Duendeneta Dilleis volverá amenizar a Zona Gastro durante a xornada, que arrincará cos espectáculos de Alizza, Biznaga e Gara Durán. Xa pola noite chegarán os directos de La M.O.D.A. Mr. Kilombo e La Pegatina, mentres que os mexicanos Sonido Gallo Negro e NDLR serán os encargados de despedir a 23ª edición de SonRías Baixas ata as tres da madrugada.
Os últimos abonos e entradas de día para SonRías Baixas continúan dispoñibles a través sonriasbaixas.info e enterticket.es.
Tras unha edición de récord en 2025, que superou as súas mellores cifras de asistencia e retorno económico para a comarca, SonRías Baixas continúa medrando sen renunciar á súa esencia de festival próximo, inclusivo e profundamente vencellado ao territorio. A pasada edición xerou un impacto económico de 3,1 millóns de euros e preto dun milleiro de empregos directos, consolidando o seu papel como un dos principais motores culturais, turísticos e económicos de Bueu e as Rías Baixas.
Este crecemento veu acompañado ademais polo recoñecemento internacional obtido nos Iberian Festival Awards 2026, onde o festival foi distinguido con tres galardóns: Best Festival Photo, concedido por segundo ano consecutivo ao fotógrafo Javier Bragado; Contribution to Sustainability e Best Hosting and Reception, premios que recoñecen tanto o seu compromiso coa sustentabilidade como a experiencia que ofrece ao público.
SonRías Baixas está promovido pola produtora PlayPlan, responsables tamén de BIGSOUND Pontevedra, Festival do Pasatempo e Fumega Fest. Conta co apoio da Xunta de Galicia, a través da Axencia Turismo de Galicia, no marco dos Concertos do Xacobeo así como coa colaboración de Galicia Calidade e Xacobeo 2027; a colaboración institucional do Concello de Bueu; e o patrocinio da Deputación de Pontevedra e Turismo Rías Baixas, a través da marca Rías Baixas Fest. O evento conta, ademais, coa colaboración de Bico de Xeado e Los40 e Radio3 como medios oficiais.
Foto: Javier Bragado