TANXUGUEIRAS

Mulleres fortes, valentes e empoderadas. Cantareiras dunha nova década. As voces de Olaia Maneiro, Aida Tarrío e Sabela Maneiro, ateigadas de virtuosismo e contundencia, son as máximas expoñentes dunha xeración aberta á evolución e reformulación das músicas de creación colectiva galega.

Recoñecementos:

    • XIX Premios La Opinión de Música de Raíz 2020 (Mellor adaptación dunha peza tradicional)
    • World Music Charts Europe 2020 (20 mellores discos de World Music en maio de 2020)
    • Certame aRi(t)mar Galiza e Portugal 2019 (Mellores Músicas de Galiza 2019)
    • Premios Mestre Mateo do Audiovisual Galego 2019 (Finalistas Mellor videoclip por Perfidia)
    • Scots Trad Music Awards 2019 (Finalistas na categoría de Mellor vídeo con Shooglenifty)
    • Premios MIN de la Música Independiente 2019 (Finalistas Mellor álbum galego)
    • Premios Martín Códax da Música 2019 (Mellor grupo de Música tradicional e folk)
    • Premios MIN de la Música Independiente 2018 (Mellor álbum galego)

    Discografía

    Co seu primeiro álbum homónimo, publicado en 2018, o trío inicia unha traxectoria que as leva a visitar, en só 3 anos, máis de 100 escenarios de todo o planeta acompañadas polas súas pandeiretas. No 2019 chega Contrapunto, un disco que incrementa as revolucións da música galega coa reinterpretación de coplas tradicionais, ateigadas de arranxos e harmonías diversas.

    Neste 2021, as cantareiras libéranse de prexuízos para consolidar a identidade dun grupo que explora con curiosidade a fusión da tradición con sonoridades urbanas e modernas. O seu último single, Midas, con influencias de sons próximos ao trap ou á electrónica, pon o foco sobre unhas artistas audaces, chamadas a levar os ritmos e a enerxía da terra por escenarios de todo o mundo.

    Con máis de 50.000 reproducións en Youtube na fin de semana da súa estrea, Midas é a carta de presentación das cantareiras do século XXI.

    Ao vivo:

    O directo de Tanxugueiras é pura enerxía e potencia. As voces de Aida, Olaia e Sabela ligan en harmonía, naturalidade e mestría alalás, músicas e letras. Con ou sen pandeiretas, o son e forza de Tanxugueiras expándense alén do escenario para transformar o recital nunha festa. Cun repertorio que se move entre pezas íntimas e de corte tradicional con himnos que abanderan causas, o público de todas as idades goza dunha sesión vibrante, chea de momentos únicos nos que as cantareiras dan boa conta da proxección dunha formación única en Galicia.

    Formación

    Sabela Maneiro – voz e pandeireta
    Aida Tarrío – voz e pandeireta
    Olaia Maneiro – voz e pandeireta
    Isaac Palacín – percusión

    • MIDAS | Single (2021, PlayPlan | Calaverita Records)
    • Contrapunto (2019, PlayPlan | Calaverita Records)
    • Tanxugueiras (2018, Seispés Producións Creativas)

    Vindeiros concertos de Tanxugueiras

    X