GARCÍA MC

Un dos grandes precursores do hip-hop en Galicia

García Mc é un dos referentes da cultura hip-hop. O rapeiro galego leva reivindicando, divulgando e traballando en prol deste xénero dende o inicio do seu proxecto, que acumula a día de hoxe máis de 25 anos de actividade. A súa dedicación na difusión dos ideais do hip-hop levouno a impartir clases, obradoiros e dar concertos por países como Portugal, Dinamarca, Cuba, Guinea-Bissau ou México, entre outros. Destas experiencias nace o carácter innovador e o enfoque multicultural que marca a súa carreira, tendendo pontes e tecendo redes con Latinoamérica e as súas músicas. O resultado destas sinerxías, a súa implicación a nivel social nas súas letras e actos ou o seu potente directo elevan ao seu proxecto a ser un dos nomes máis respectados do xénero en Galicia.

Tras a experiencia xunto a Nación Quilombo, a banda de músicas do mundo que fundou e o acompañou dende 2016, García Mc comezou a asentar as bases do que será o seu próximo traballo cos adiantos de Quen son eu?, xunto a Xisco Feijoo; Aguardiente, xunto a artistas do mítico grupo Orishas, Julio Maloa, integrante de La Raíz, ou Dj Hazhe, e Permanece Sempre, o seu máis recente sinxelo. Estes temas estarán incluídos no seu próximo lanzamento discográfico, que verá a luz en forma de EP e recibirá o nome de Sergio Manuel, cun claro carácter autobiográfico e no que amosará a súa faceta máis innovadora, versátil e inconformista.